Reecher Baubetrieb am Bach

Aufgepikt · Am neckschde Sunndaach gebbds bei der Dengmerder Volkshochschul e inderessanndi Wannerung midd Informazioone zum Biber im Rohrbachtal. Das knuffische Tierche iss joo schwäär beliebt unn das nidd nur bei de Naturfreunde.

Mer denkt doodebei direggd an das Stichwort: Rehnaturierung unn so.

Obwohl mer ehrlicherweis aach saan muss, dasser nidd iwwerall nur Begeischderung ausleest. Weil der Biber joo Sache macht, fier die unser Bolidigger normalerweis kabareddisdisch unn karnevalisdisch in die Pann gehau werre. Er duud zum Beispiel äänfach Bääm fälle und zwar ganz ohne Genehmischung odder Aanmellung. Unn er verursacht ganz scheene Staus. Seminneschdens bei de Fisch. Unn bei denne Immobilije, die wo er im Wasser baut, doo wääs mer aach nidd, ob die de geltende Vorschriffde so ganz entspreche.

Also dass doo zum Beispiel de Notausgang unner Wasser leid, das geht baupolizeilich schunnmool iwwerhaupt nidd.

Awwer er sieht halt so knuddelisch aus midd seine Hasezähncher. Desweeje iss sei Konterfei joo schunn e gängisches Simbool worr fier alles was vorre midd Bio aanfangt. Sogar bei der Zahnpasta unn aach in de Broschiere vunn der Biosphäre em Bliesgau. Richdisch makaber iss awwer, dass sei ladeinischer Noome - Castor - fier ziemlich es genaue Geejedääl steht. Awwer vielleicht wollde se uns doodemidd zart aandeite, dass Atom-Müll aach e Naduurproduggd iss.

Friejer hadd dem Nagetier sei puddsisches Aussiehn allerdings nix geniddsd. Doo war mer hinner seinem Fell her, was fier die Gesamtpopulazioon fatale Folge gehadd hadd. Aus der Zeit gebbds sogar e beriehmdes Teaaderstigg: Der Biberpelz, e berihmti Diebeskomödie vum Gerhard Hauptmann. Awwer doodruff simmer joo heit zum Gligg nimmeh aangewies unn de Biber brauch vor uns Naduurliebhawer kää Angschd meh se hann - kenner will em meh an de puddsische Pelz.

Meistgelesen
Neueste Artikel
Zum Thema
Aus dem Ressort