Doo iss dann schunn es Zugugge faschd e schweißtreiwende Aangeleechenhääd. Vielleicht sollde se äänfach praggdischerweis es Schwimme am Schluss absolviere, weeje der Erfrischung. Das Wort Triathlon das kummt joo vunn de alde Grieche. Heidsedaachs iss allerdings alles uff englisch, was sich im Bereich Kerper-Ertüchdichung so abspielt. Das iss iwwrischens aach so e uraldes Wort, wo ball kenner meh kennt. Die äänzelne Dääle vunn dem Wettbewerb nennt mer Diszipline. Weil mer doodefier so furchtbar hart träniere muss. Äldere Semeschder wie ich, die nimmeh so uff die Zähn beiße kinne, halle sich doo liewer an de Rentner-Dreikampf. Der besteht aus Air-Snapping, wammer oowends noch um die Block geht fier e bissje Luft se schnappe. Anschließend leed mer uff der Kautsch die Bään hoch. Das iss dann es Leg-Lifting. Unn sunndaachs morjens treffe sich all die Kummbele in der Wertschaft beim Frieh-Shopping. Was aach gääre betrieb werrd iss in der Verwaldung de beliebte birrokraadische Dreisatz. Wann doo neije Anordnunge uff de Disch fladdere, werre die verschafft noo dem Moddo: Gelääs - gelacht - gelocht.Iwwrischens: Falls Sie sich fier die Sportart inderessiere, gehnse noch mool hin gugge. Es kinnd nämlich sinn, dass in Zukunft so Wettkämpf garnimmeh erlaubt werre, bei denne wo mer eventuell aach mool verliere kinnd. Weeje der zarde Psüüche vunn de Sportler.