Awwer nidd weil die Musigger zu mied wäre unn kää Luschd meh gehadd hädde fier in der Luschd se spiele. Nää, weils Huddel midd de Leidunge gebb hadd unn es Örtche hadd misse renoviert werre, hannse die Örtlichkääd gewechselt. Unn wie sich das fier die Hochkulduur geheert gleich de Bersch enuff. Vunn der Tiefebene in der Innestadt in die Heejelaache uffem Howwels. Doo leid nämlich hinnerm Pfarrheim e alder Stäänbruch, der wo sich ideal als Ausweichquartier eichne duud. Unn e quasi Bayrischi Blooskabell wie zum Beispiel die Werzbachkrainer die kunnde dort schunn original Heejeluffd schnubbere.Außerdem iss das Freilicht-Areal joo e tradizioonsreichi Kulduur-Stätte, wie die alde Dengmerder noch gudd wisse. In dem Stäänbruch iss nämlich ganz friejer schunn Freilicht-Theaader gespielt worr. Das hadd mir vor e paar Johr ganz stolz es Dengmerder Original, de Senkel, verzählt. Dass er dort vorm Kriech schunn mitgespielt hädd. Unn inne in dem Pfarrheim, wo jedds alles scheen renoviert iss, doo gebbds e Biehn, wo in de sechzischer Johre aach geschauspielert worr iss. Ich kann mich noch gudd erinnere, wie ich als hoffnungsvoller Nachwuchs-Mime in dem Schwank Die spanische Fliege de sanfte Heinrich uff die Bredder geleed hann. Unn vielleicht spiele se bei äänem vunn de Konzerde im Stäänbruch aach denne Oldie: Marmor, Stein unn Eisen bricht …