Unn falls nidd, doo brauchd mer se nidd fortseschmeise, mer duud se äänfach lösche. Unn in der Urlaubszeid, doo geht die Knipserei erscht richdisch los. Permanend sieht mer, wie jemand sich uff die Zeewespiddse stellt un de ääne Arm hochhalt. Ich hann schunn gedenkt, der wollt mir winke. Unn hann mich noch gewunnert, dass ich denne gar nidd kenne. Awwer der macht nur Foddos middem Händi. Uff der Zuchspidds, uffem Kreuzfahrtschiff unn sogar uffem Peterspladds. Unn awweil gebbds sogar Händies am Stiel. Was uff englisch e Stick hääscht. Wahrscheins weil mers e Stigg weit vunn sich weg halle muss, dass mer sich selwer middfoddografiere kann. Vorzuuchsweis sesamme middeme Prominennde.

Bei mir hadd das allerdings noch kääner prowiert. Technisch sinnse jedds sogar soweit, dassmer im Indernedd gleich feschdstelle kann, wer doo uff some Bild druff iss. De Kommbjuuder soll emm sogar neijerdings vunn hinne erkenne. Mir solls recht sinn, ich bin vunn hinne joo sowieso scheener. Doodrumm gehts nämlich bei der ganz Knipserei, dass mer meeschlichst scheen druff aussieht.

Mei Freind Schorsch hadd neulich ganz stolz verzählt, es hädd ääner zu ihm gesaad, er wär schwäär fotogeen. Unn doo bischd du aach noch stolz druff, hann ich zum gesaad. Das heischt doch im Klartext nix anneres als dass du in Werklichkääd nidd so scheen bischt wie de uff de Bilder aussiehscht.