Doo kammer nidd meggere

Ich wääs joo nidd, obs friejer in der Hinsicht besser war, awwer in leddschder Zeit werrd de alde Spruch: Doo kammer nidd meggere uff de Kobb gestellt. Mer hadd de Inndrugg, iwwer alles unn iwwer jeder werrd kräffdisch hergezoh. Heidsedaachs doo mache se sogar so Widdse wie: Kinner kummen rinn nörgele, es Esse iss ferdisch! Es Jammere unn Maule iss scheins e richdischer Volkssport worr. Unn wanns jedds in de Herbschd unn de Winder geht, kried mer ohne Probleme e Trübsal-Blasorchester sesamme.Nadierlich gebbs jede Daach Geleechenhääde noch unn nöcher, dass emm ebbes uff die Palme bringt. Mer brauch bloos die Zeidung uffseschlaan. Unn dann die liewe Mitmensche! De dabbisch Vordermann midd seiner Schroddkarre, wo nidd voranmacht. Odder die Madam, wo im Subbermarkt midd ihrem Wäänche noch schnell vor emm ninnwiddschd wann die zwädd Kass uffmacht. Unn iwwerhaupt, was die fier e unmeeschlichi Frisur hadd unn wie die schunn aangezoo iss. Wammer dann noch in de Fernseher guggd unn die ganze ABC-Promies sieht, doo geht em sowieso manchmool de Hudd hoch. An so Daache kummt mer ausem Lästere iwwer annere Leit garnimmeh raus. Unn hinnerher äärjerd mer sich dann graad noch emool iwwer sich selwer. Weil mer sich weeje so Lapalie kinschdlich uffgereecht hadd unn emm de Blutdrugg unneedisch uff 220 hochgeschoss iss. Awwer jedds hann ich joo gelääs, mer bräucht desweeje iwwerhaupt kää schlechdes Gewisse se hann. Wer nämlich läschdert unn räddschd, lääbt schwer gesund unn womeeschlich sogar länger. Das wär alles streng wissenschaftlich bewies. Unn demnäägschd krien mer das vum Doggder verschrieb. Wann ihne also nochmool ebbes quer kummt, duun se sich kää Zwang aan.