Doo geht emm's Herz uff

Neilich hann ich irjendwo gelääs, de Friehling werrrd sei Schadde vorauswerfe. Doo brauch mer sich nidd se wunnere, dass de Sonneschein nidd richdich in Gang kummt. Es iss awwer meh doodrumm gang, dass jedds figürlich das zum Vorschein kummt, was mer sich de Winder iwwer aangefuddert hadd. Doodefier, odder besser gesaad degeeje gebbds all meeschliche Faschde-Kuure. Es allerneijeschde iss es Zigg-Zagg-Faschde. Das heerd sich faschd aan wie de Schlachtruf vumme Fuusballklubb. Wo mer sich aanfeijere duud, dass mer nidd schlabb macht. Das kann emm nämlich im Friehjohr leicht passiere, wammers midd der Askeese iwwertreibt. Doo kammer awwer immer noch uff das bewährde Inderwall-Faschde serigg greife: noo jeeder Mahlzeit erschd mool drei Stunne nix meh. Doo trefft sichs gudd, dass die Ernährungs-Experdin ausem Fernsehn jedds gesaad hadd, es misst kääner bei uns uff sei gewohnder Liooner verzichde. Weil mer graad um die Johreszeid aach sei Energiespeicher widder ufffille muss.Annererseits gebbds in Dengmerd graad e ganzer Haufe Vorträäch, wie mer iwwerall Energie innspare kinnd. Am beschde fangt mer doodemidd bei sich selwer aan: Eichendlich missd ich joo ebbes schaffe, awwer ich hau mich liewer uff die Couch unn leeje die Bään hoch.Es Friehjohr iss allerdings aach die Zeit, wo emm es Herz vunn sendimendaale Gefiehle uffgeeht. Die wo mer dann am liebschde in der freie Naduur austobt. Das geht sogar soweit, dass manche Leid im Iwwerschwang Herzjer in die Bääm schneide. Das finne die dann romandisch. Also ich wääs nidd, ich finnes joo eejer e bissje beunruuhischend, wann ich mer iwwerleeje, dasses Gemietsmensche gebbd, die wo zum Rendez-Vous e Messer mitnemme.