Sogar Normalverbraucher, wo sunnschd schwäär uff de Penning beziejungsweis de Cent gugge, die losse in dem Fall gääre mool ebbes springe. Weils joo so aristokraadisches Gemies nidd jede Daach gebbd. Unn aach wer sich sunscht bei Faschd-Food geschmaggsmääsisch die Gaumeschrauwe anzieje losst, der greift in der Sparchel-Säsong zu ebbes Edlem.Fascht wie in der Haute Cuisine, was sovill hääscht wie hoh Kich. Was allerdings bei denne e bissje schwierisch iss, wo die Kich im Souterräng leid. Wie ich mich im Indernedd iwwer denne Leggerbisse hann wolle erkunnische, doo hann ich e Schregg krieg. Do hadd de Sparchel sogar uff rer Auktions-Webseit gestann. Um Himmels wille, hann ich fier mich gedenkt, die werre das Zeich doch nidd gebraucht aanbiede. Es iss dann awwer nur um de Ziersparchel gang, denne wo mer sich ins Wohnzimmer hänge kann.Weeje seinem röhreförmische Aussiehn nennt mer joo jemand, wo ziemlich derr iss, scherzhaft e Spargel-Tarzan. Nääwe annere wunnersame Wirkunge soller nämlich aach schlank mache. Weiler aangeblich entwässere duud. Awwer ich glaab, zum Abnemme isser erschdens zu schaad unn auserdemm nidd besonnerschd gudd geeichned. Weil er nämlich generell midd rer digg Soos serviert werrd, in der wo die Kalorie im Friehjohr anscheinend ihr Betriebsversammlung abhalle. Unn welli Soos doo am beschde dezu passt, doodefier gebbds e eicheni Wissenschaft, die sogenennde Soosiologie.