Awwer wie ich uns kenne, krien mir dann nur e großer Schregg: Ei, wo hann ich dann jedds bloos mei Händie hingeleed? Nää awwer ohne Spaß, das saad emm doch schunn de gesunde Menscheverstand. Wammer sich nur noch midd eleggdrische Hilfe durch die Welt beweeje duud, doo kanns passiere, dass irgendwann mool die Sicherung durchbrennt. Unn wie abhängisch mir vunn denne ganze digitaale Spielzeiche worr sinn, das merke mer spätestens dann, wann mool de Strom ausfallt. Odder de Aanbieter unseres Vertrauens widder uff der Leitung steht. Mer nennt das Ganze joo nidd umsunscht on line. Unn die Leine sollt mer halt ab unn zu e bissje loggere. Wammer schunn es iwwrische Johr vor irjend e Karre gespannt sinn, sollde mer weenischdens in der Freizeit mool ausspanne. Friejer hadd mer doozu gesaad: Eile mit Weile. Heid nennt mer das middme Fachausdrugg Entschleunische. Die beschd Zeit doodefier iss joo de Urlaub, der wo jetzt aach ball uff uns zukummt - ganz langsam. Was aach gudd helft geeje Heggdigg iss joo die Nadduur, wo zur Zeit midd ihrem Grien rechelrecht strunzt. Am Wombacher Weiher zum Beispiel duun se awweile e Schuddsgebiet innrichde. Doo kammer dann de Hochlandrinder beim Wiederkäue zugugge. Das beruhischd ungemein.Unn noch e Tipp fier heit Oowend: Falls ihne bei dem Fußballspiel widder mool die Nerve fladdere sollde: tief durchatme, entspanne unn immer de Ball scheen flach halle.