Mundart Alles rein pflanzlich
Wammer in de Stadtpark vunn owwe rinnkummt, leid doo gleich rechterhand e üppisches Nassbiotop, wie die Fachleid saan. Wo se graad de Daach der biologischen Vielfalt gefeiert hann. Und uff denne neije Info-Tafele steht druff, warum das heid so wischdisch iss.
Fier all die woos noch nidd ganz kapiert hann sollde. Desweeje laafd in Dengmerd zur Zeit aach e Wettbewerb fier de bienefreindlichsde Gaarde. Wammer sich ringsrum die blühende Landschafte betrachte duud, doo kinnd mer als Moddo driwwerschreiwe: loss wachse.
Am Rathaus werrd sogar Gemies aangebaut. Es heischt joo aach oft, mer solld Blume schwäddse losse. Doo empfehle sich am beschde Leewemäulcher. Unn das alles doodefier, dass die Inseggde e vegetatiefi Infrastruggdur vorfinne unn sich hie wohlfiehle. Unn nidd se vergesse die Veschel. Wo mer joo aach heert, dass die sich hie rar mache. In dem Sesammehang hann ich iwwrischens neilich zufällisch middkried, dasses im Westerwald e Ort midd dem anheimelnde Noome „Atzelgift“ gebbd. Das iss joo derzeit aach so e Reizthema. Midd was mer so alles bei denne chemische Spriddstuure die Naduur begligge duud. De Mensch iss nämlich, was die Tierwelt aangeht, nidd ganz unparteiisch. Doo werrd unnerschied zwische Nutzvieh unn unniddsem Viehzeich. Geeje so e Bienche odder e Schmedderling hadd zum Beispiel e Worm immiddschmääsisch kää Schangse.
Obwohl der joo erwiesenermaase schwäär niddslich iss fier die Gewächse, wo doo wachse. Es heegschde der Gefiehle is noch, dass merne zum Angle middnemmt. Unn imme groose Kaufhaus hann ich jedds sogar Wermer gesiehn wo mer esse kann. Weeje de Proteine. Abetiddlich verpaggd unn legger aangemacht midd Zwiwwele unn Crääm frech.
