Mei Freind Schorsch war schwäär enttäuscht. Er hadd sich nämlich graad fescht vorgenomm, im neije Johr mool ebbes fier sei Bildung se duun. Unn er hadd zu dem Zwegg wolle die näägschd Wuch hie in der Stadthall ins Teaader gehn. Awwer Peifedeggel, die ganz Vorstellung war schunn kombledd ausverkaaf. Ich hann mir verkniff fier ne se frooe, ob er nidd dehemm schunn genuch Teaader hädd. Unn hann nur zart druff hingewies, dass das devunn kummt, wammer immer waard bis uff e leddschde Drigger. Bei so Veraanschdaldunge wo Prominende mitmache, die wo mer vum Fernsehn kennt, doo streeme nämlich die Masse hin. Unn nidd bloos die Abonennde, wo sowieso schunn e Kaard hann. Friejer hadd dann uff de Plakaade aach noch druffgestann: Bekannt von Funk unn Fernsehen. Obwohl das dann meischd die Kinschdler ware, wo kää Mensch vorher gekennt hadd. Weil mer das bei denne richdische Stars nidd hadd misse dezu saan.Unn uffem Programm steht joo e Komeedieje, woose aach schunn e Film devunn gedreht hann. E Seltsames Paar hadd der sellemools gehiesch. Unn das iss immer die beschd Voraussetzung, dasses ebbes se lache gebbd. Wammer so zwää unnerschiedliche Tüüpe ufenanner loslosst. Bis die Funke sprüje unn die Feddse flieje. So wie im richdische Lääwe halt aach. In dem Fall so e ganz pinglischer Ordnungsfanaadigger inrer Wohngemeinschaffd middeme Chaot aus Iwwerzeuchung. Wo das midd dem Uffraume nidd so eng sieht. Heidsedaachs saad mer joo Messie dezu. Doodemidd iss nidd der Fuusballer gemennt, eejer so e Profi im Verschdruddele. Der wo sich, wann Ordnung es halwe Lääwe iss, meh an die anner Hälft halt. Unn wer Ordnung halt, das wääs mer joo, iss bloos se faul zum Suche.