Das iss widder so e Angebood, wo die Film-Fänns unn die Frankophile hie midd der Zung schnalze. In der Kino-Werkstatt in Dengmerd, die wo graad ihr 40-jährisches Jubiläum gefeiert hadd, gebbds ab morje franzeesische Filme am laufende Meeder. Am Sunndaach bin ich besunnerschd gespannt uff denne Streife "Le prénom", uff Deitsch "Der Vorname". Weil der erschd vor kurzem hie in der Stadthall im Abonnemang als Teeaderstigg gezeid worr iss.De moderne Trend uff de Biehn geht joo eejer umgeehrt: doo duun se alles teeadralisch verwurschde, wasse nur in die Finger krien: Am liebschde ebbes, was die Leit vunn irjendwo annerschd her schunn kenne. Das iss e alder kaufmännischer Verkaufs-Trigg: Am beschde gehn inngefiehrde Marke. Unn hinnerher gebbds dann das Buch zum Film. Obwohls das betreffende Buch meischd schunn gebb hadd zu Zeide, wo sich es Kino noch im Kobb abgespielt hadd. Awwwer wie gesaad, inderessant isses joo schunn wammer die verschiedene Fassunge mool middenanner vergleiche kann. Es geht doo um e heikles Thema: Wie soll unser Kind mool heische? Die Wahl vun de stolze Eltere orientiert sich dann oft - sosesaan wellefermisch - an de wechselnde Vorliewe im Wandel vun de Zeide. Unn die Kinner misses dann ihr Lääwe lang ausbade.Apropos Name. Sie hann sicher schunn gemerkt, dass unser Zeidung jedds e neijer Aanstrich verpasst kried hadd. Unn es missd unner jeder Ardiggel in Zukunft de Name vumm Verfasser stehn. Ich bin joo eichendlich e Aanhänger vunn dem Moddo: Incognito ergo sum. Awwer weeje mir, bevor ich mich schlaan losse. Also dann liewe Leserinne unn Leser - wie der midd dem groose Schnurres im Fernsehn immer so scheen saad: Isch bin de Horst.