Bei uns, im Land der Dichter unn Denker gebbds haufeweis ganz fiese Bänker, die hann, vonn Reiwach-Gier verloggd uns ebbes Schlimmes inngebroggd! Ob Lehmann-Brieder, Island-Banke, alles iss jetzd schwer am wanke! Wer Aktsje hadd, muss pletzlisch erfahre noch nedd's Babbier wert sinn die allegaare! Unn die Regierung muss, midd unserem Geld de Schlammassel inn de ganze Welt - nett nur graad mòòl mit e paar drobbe - nää, Löcher ohne Boddem schdobbe! Ganz schlimm iss, dass de klääne Mann, wo dòòdefier rein garniggs kann, die zesch bezaahld, sei Arwed verlierd, dieweil die Herre, unschenierd, sisch weiderhin die Dasch vollschdobbe! Deene missd ma off die Hörner Klobbe! Besser noch, in die Bobbesse tabbe, - so saats jedenfalls mei Babbe - Mit dausend Euro im Monad missde die erumkomme, dann wissde die unn dääde schnell merke, so weh duht es hald wenn man de Gerdel enger schnalld! Was soll's, Ihr Leid! Isch saahn zum Schluss: All denne Ärjer unn verdruss den misse mir midnanner schlugge, am beschde, ohne offzumugge, unn hoffe, nòò demmdòò Gewidder scheind aach fier uns die Sonn ball widder! Bleiwen zefriede unn bleiwen bescheide - unn freien Eich off bessre Zeide!Rudolf Werner