1. Saarland
  2. Neunkirchen

Drei Mischelle oder: Ein Lob auf die Taxifahrer

Drei Mischelle oder: Ein Lob auf die Taxifahrer

Es glingeld. De Taxifahra schdedd vor da Dier. Är is arisch vawunnadd, weil isch noch nid gons gemuschddadd binn. " Sinn Se so gudd, unn binne Se ma die Schuhneschdelle unn helfe Se ma inn de Mondel. Isch binn uff mei reschd Hond gefall." "Donn awwa fix bei de Doggda!", mennd de Taxifahra Mischel

Es glingeld. De Taxifahra schdedd vor da Dier. Är is arisch vawunnadd, weil isch noch nid gons gemuschddadd binn. " Sinn Se so gudd, unn binne Se ma die Schuhneschdelle unn helfe Se ma inn de Mondel. Isch binn uff mei reschd Hond gefall." "Donn awwa fix bei de Doggda!", mennd de Taxifahra Mischel. Es is ääna vunn denne drei Mischelle, die misch inn de näägschde Wuche hinn- unn härdronsbordiere - unn das bei strenga Käld unn Gladdeis. De erschde Mischel gäbbd die Order weida, wie ma sisch mir geeniwwa se vahalle hadd. Die Männa sinn mid emme Sanidääda se vagleische. Sie behonnele misch vorsischdisch, sosesoon wie e roes Ei. Wonn se misch hinn- unn härkuddschierd honn, si ma iwwagligglisch, dass emol widda alles gudd gong is. Mei Hond is gebroch. Das heischd: Uffpasse! Uffpasse! So ebbes soll nid noch emol passiere. Die drei Mischelle halle misch bei Laune. Monschmol lache ma aa. Heid hadd die gudd Laun Burzelboom geschlaa. Där Mischel, denne, wo isch schunn seid seine Kinnajohre kenne, war mei Fahra. Grad ho ma imm Audo gehuggd, do fongd där Kerl doch oon, gons "firschdalisch" se lache. "Ei, forwas sinn Se donn so gudd gelaund?", honn isch gefrood. "Grad honn isch dron gedengd, wie Se Fronseesischlehrarinn inn unsara Glass ware. Domols hädd isch ma nid drääme geloss, dass isch Ihne mol die Schuhneschdelle binne muss unn inn de Mondel helfe derf." "Siehn Se", honn isch gesaad: " Domols war isch jung, honn Schiescha mid hoe Absädds gdraa unn war e rischdischa Wirwelwind. So ännere sisch die Zeide!" Donn honn isch aa herzhaffd lache misse. Die Erinnarung hadd misch nid imm Schdisch geloss. Ich glaab, no där Geschischd gedd's ma schunn e bissje bessa. Vielleischd soll ma sisch effdasch onn gudde Zeide erinnare, donn is die Weld nimmeh so grau. Ilse Siebenpfeiffer-Märker