Kolumne Saarmòò Vum Struwwelpeter lerne?
Schwarze Pädagogik oder ein einfaches Kinderbuch? Unser Kolumnist kann dem Struwwelpeter vor allem Gutes abgewinnen.
Struwwelpeter? Liewe Leid vadeiwele ne als „Schwarze Pädagogik“, wo uff 20 Seide nur drohd unn stròòfd. Dòòmid (wie isch) vákorgsd – unn nidd gehäämeld mid z.B. Dausende menschefreindliche Fernseh- unn Indernedd-Morde, klääbsch‘de, stadd in freier Endfaldung die Sau rausselosse, an váklemmde Sprisch wie: Mach nix Beeses! Sei bei Mensche, Diere, Umweld vòrsischdisch unn freindlisch! Disch selwer hall hääl unn gesund! – Jòò, immer schaff isch das nidd. Awwer‘s gehd ums Prinzib. Gugge má mòò im Ernschd uffs Struwwelpeter-Personal:
De Friederich schlaad‘s Gredel.„Häusliche Gewalt“: Bidderbees! saad 1844 dòòzu das Buch – weid klarer als Wischiwaschi-Gesedze dòòmòls unn lang denòò. Is der Dreggsagg zu doll gestròòfd, wenn ne „in Noodwehr“ e Hund dief ins Bään beisd? Haubdsach, er unn annere klääne und groose Wadze lerne draus, odder?
E Denkzeddel krien ach die beese Buwe, die sisch dummstolz uff ihr helli Haud (forr die se nix kinne) ebbes inbille unn desweje der mid dunkler Haud piesagge. Mid dá Lehr dòòdraus is de Struwwelpeter seiner unn allzuoft ach noch unsrer Zeid weid vòraus.
Beim grasgriine Jääscher schlaad in Gestald vum Häsje die malträdierd Nadur serigg. Hädde mir Iwwerschlaue nidd wie der Griinrogg aach die Endwigglung váschlòòf, kinnd unser Erd vill gesinder sinn. Griine Klääder allään lange nidd.
Es Paulinsche vábrennd selwer beim Spiele mid Feier. E drasdischi Waanung forr Kinner, awwer ach groose Brandstifder! Em Subbekaschber sei Maachersuchd? Real sterbd má dòòvun nidd am finfde Daach, schlimm is es späder aach. De Zabbelphilipp? Dass Eldre „zornig“ sinn, weil‘s Esse fudsch is, scheind mir menschefreindlischer, als e Kind bei ADHS-Verdachd mid Ritalin vollsebumbe. Unn de Robert iwwerstehd’s Unwedder im Haus besser als in Orkan, Staagrään unn Tennisball-Haachel. De Daumeludscher? Nää, das iwwerspring isch.
Umso gelungner de Hans-guck-in-die Luft! Der zeid uns, wohin uns Polidig, Geiz (is geil) unn Gier gefihrd hann. Groose Plän forrs Jòhr 2100, awwer die Nas zu hoch traan, forr se siehn, was jedz vòr unsre Fiis lauerd. Wie de Hans zur Waanung iwwer e Hund stolberd, kinnde ach mir gewaand sinn – unn falle doch mid Energie unn Klima in die Brih, ohne schwimme se kinne. Nur dass uns känn „Mònn mid dá lòng Stòng“ widder rausziehd.
Alles in allem: Wer vástehn will, kann ach heid lerne vum Struwwelpeder. Awwer selbschd wenn: Ob das noch reschdzeidisch kummd?
Peter Eckert schreibt in Saarbrigger Platt.
