1. Saarland

Mundart-Kolumne

Mundart-Kolumne : Wäänsches-Ballaawer

Auch der normale Einkauf im Supermarkt kann große Herausforderungen mit sich bringen, musste Kolumnist Georg Fox feststellen.

Äämòò in der Wuch fahre mier in de Subbermaargd. Dò breischd mer de erschd mò e Eiroo, fier dass mer das Wäänsche aach vun der Kedd gridd. Wann mers rischdisch holld: Ääner Eiroo iss eischendlisch billisch fier so e Wäänsche! Isch binn vòor Moonaade mò dursch denne Laade gelaaf unn hann der Reih nò all Sache, woo mier gemäänerhann kaafe, in de Kombjuuder ingenn. Dò duud Meins jeddse uffem Inkaafsdseddel nuur noch aangreidse, wasses hann will. Unne uffem Dseddel kann se noch das ään odder anner uffschreiwe, wass nidd jeed Wuch kaaf gebbd. Muschd awwer nidd glaawe, dass jeddse alles äänfacher gehd. Leddschd Wuch hann se in demm Laade all Reggaale verschdelld unn alles hadd greids unn gweer geschdann. Die mache das egsdra, fier dass all Leid mò rischdisch wurres genn.

Wie mier gefròòd hann, ob der Sallaad aach frisch wäär, hadd die Verkeiferin gebaubsd: „Ei das wäär jò dsem Dunnerwedder, wann mier nidd siehn gääde, dass der Salaad noch vòòrer Dreivirdelschdunn uffem Feld geschdann hädd.“ Mier hann danne niggs meh gesaad unn sinn die Aangeboode gugge gang. Dò hadds Schuh, Schdrimb unn Unnerbuggse unn was wääs isch was noch alles gebb. Isch hann gefròòd, woo die Kabbiene sinn, fier die Unnerbuggse mò aandsebrowwiere, awwer die Verkeiferin hadd nuur de Kobb geschiddeld.

Mid demm Wäänsche muschde uffbasse, nidd dass  annere Leid gerembeld genn odder dass mer e Karrambelaasch machd. Mei Fraa hadd alles durschenanner ins Wäänsche geschmiss unn isch hann als immer nò der Ordnung im Wäänsche gugge misse. Nidd dass es Dseisch, woo verdriggd gebbd, gans unne leid! Unn dòòdriwwer hädde mer uns beinäggschd noch in die Woll gridd.

Wie mier danne aan die Kass kumm sinn, hadd dò e Wäänsches-Schlang geschdann. Mer glaabd jò nidd, was die Leid so alles inkaafe. Isch fròò misch immer, ob die wirglisch alles esse, wasse im Wäänsche hann. Manschmò dengg isch, die wolle nuur schdrunse, weil se vill inkaafe. Die Fraa aan der Kass hadd widder mei gans Ordnung verschdruwweld. Die hadd so schnell alles iwwer de Piebser gedsòò, dass de beinäggschd dòòrdisch genn bischd.

Am Audo hammer danne alles inne Wäschkorb ringereimd unn sinn dabber hemmgefahr. Nääggschd Mòòl holl isch mer fier ääner Eiroo das Wäänsche mid: Das gebbd grien laggierd unn als Deggeradsjoon in de Gaarde geschdelld. Dò hann die Bluume vun unne Lufd, mer kann se gudd giese unn das duud aach noch gudd aussiehn!

Georg Fox schreibt in rheinfränkischem Dialekt. Sein neues Buch heißt „Saarlandfarben“ (Edition Schaumberg). Seine Mundarttexte sind auf den CD-Hörbüchern „Òòmends schbääd“ erschienen (www.nachtgedanken-saarland.de)