Mir hann e Zuuch zur Naduur

Die Paledde vunn Erfindunge, uff die die Welt gewaard hadd, hadd jedds e Saarlänner um e bahnbrechendes Erzeichnis bereichert. Er hadd sich so e Klabb patendiere geloss, wo mer sei abgeluddschder Kaugummi drin innwiggele unn sachgerecht entsorje kann

Die Paledde vunn Erfindunge, uff die die Welt gewaard hadd, hadd jedds e Saarlänner um e bahnbrechendes Erzeichnis bereichert. Er hadd sich so e Klabb patendiere geloss, wo mer sei abgeluddschder Kaugummi drin innwiggele unn sachgerecht entsorje kann. Wofier ihm wahrscheins besunnerschd die Damewelt dankbar iss, weil das Zeich dann nidd an de Steggelschuh odder de Pömps babbd unn hinnerher uffem Perserdebbisch unscheene Flegge macht. Es sinn joo meischd die klääne Erfindunge, wo uns es Lääwe erleichtere. Weil mer die ganz groose Sprüng in der Kulduurentwigglung joo schunn hinner uns hann: Die Erfindung vum Rad, vum Buchdrugg unn vumm eleggdrische Doseeffner.Dass de Daniel Düsentrieb änner vun de kreeatiefschde Erfinder war, das wääs mer joo. Weenischer bekannt derft sinn, dass de friejere Bundeskanzler Adenauer aach uff dem Gebiet tätisch war unn zum Beispiel es beleuchtete Stopfei zum Patent aangemeld gehadd hadd. Das iss kää Widds! Unn wann jedds noch ääner e Klimaanlaach fier die Eisebahn erfinne duud, dan simmer in punkto Fortschridd schun widder e scheenes Stigg weider. Apropos Eisebahn unn bahnbrechend, die Bahn hadd jedds in ihr Programm Fahrtziel Natur aach die Biosphäre Bliesgau uffgenomm. Sie hann nämlich gemerkt, dass das so e paradiesisches Fleggche Erd iss, was mer gladd erfinne missd, wanns das nidd schunn gääb. Unn doo rangiert unser Geeschend jedds nääwe so bekannde Reiseziele wies Wattenmmeer un die Allgäuer Hochalpe. Unn in der Werbebroschüre steht am Schluss noch wertlich drin, dass de Liebreiz vun der Landschaft durch die Mittelstadt Dengmerd midd ihrer Industriekulduur und ihrem umfangreiche kuldurelle Aangebodd ergänzt werrd.

Meistgelesen
Neueste Artikel
Zum Thema
Aus dem Ressort