Die Staddverwaldung hadd jedds bei rer Inwentuur feschdgeschdellt, dass es in Dengmerd 360 Vereine gebbd. Also soosesaan fier jeder Daach im Johr ääner. Hädde Sie das gedenkt? Awwer e bliejendes Vereinslääwe iss joo eichendlich e guddes Zeiche fier e Gemeinwese. Dass sich nämlich midd vereinte Kräfde ebbes Besunneres unn Niddsliches vill besser uff die Bään stelle lossd, das saad emm joo schun de gesunde Menscheverstand.Unn vun denne ihre Aktiwitääde profidiere joo im allgemeine aach all die, wo selwer nidd direggd in dem Verein drinn sinn. Odder wer solld sunschd im Summer zum Beispiel die ganze Feschdscher odder Vereinsjubiläums organisiere? Weil, uff Tradizioon werrd joo doo besunnerschd Wert geleed.So e Verein lossd sich grob indääle in die gewehnliche Mitglieder unn in de Vorstand. Unn de Owwerschde hääschd Vorsitzender. Obwohl das joo de äänzische iss, wo ab unn zu mool uffsteht fier e Redd se halle. De wichdischde Poschde iss awwer de Kassierer. Unn dann gebbds noch die Beisitzer, das sinn die wo bei der Sitzung nur debeihugge. Mei Freind Schorsch, das iss fier denne Poschde eischendlich de ideale Mann. Der huggd glei bei mehrere Vereine in Vorstand midd debei.Sei Fraa, wo ne oowends nur noch selde se siehn kried, hadd neilich gefrood, ob er eichendlich midd seine Vereine verheirood wäär odder midd ihr. Beese Zunge hann schunn gesaad, er werrd sich gudd als Tannebaam mache. Weiler sovill Ehre-Noodele hadd. Desweeje gebbs nadierlich aach Leid, wo middem ganze Vereinswese nix am Hudd hann unn liewer unner sich bleiwe. E beriehmder Komiker hadd das mool so ausgedriggt: Er werrd nidd gääre inne Verein indrääde, der wo ihne als Mitglied akzeptiere dääd.