Dass die Azwenz-Zeit aangefang hadd, merkt mer doodraan, dass iwwerall die Weihnachtsfeiere im Terminkalenner stehn. Unn ringsrum schwäär Lääwe in de Buude iss uff de diverse Weihnachtsmärkt. Der in Rohrbach hadd de Aanfang gemacht unn in der Dengmerder Fuusgängerzoon wollese in 14 Daach joo dankenswerterweis aach widder so e Markt uff die Bään stelle. Gudd dass de Nigelaus middem Renn-Tier unnwerwääs iss, sunschd kinnd der die ganze Termine gar nidd uff die Reih krien.Unn es sieht joo werklich stimmungsvoll aus midd denne ganze Lichter. Aach wannse die Gliehbirne dies Johr abgeschafft hann. Awwer an de Gliehwein traue se sich noch nidd dran, obwohl doo manchmool aach Stoffe drinn sinn, wo mer nix genaues wääs. Es iss jedds nidd die Zeit fier kleinliche Bedenke unn fiers Spare. Aach die wo es ganze Johr brav midd der Energie knausere, leeje vor Weihnachde de Schalder uff Verschwendungsmodus um. Dass doo nur ään Lichtlein brennt, dass iss längschd nimmeh genuch bei de Ausedeggorazioone. Mir sinn joo in denne strahlende Zeide all als Konsumende gefordert, schunn weeje der Konjunkduur unn der Binnennachfrage. Apropos Frage: Ich hann doo vor soome Schaufinschder gestann, unn hann mich verzweifelt gefrood, was X-Mas bedeite kinnd. Unn ausgerechend mei Freind Schorsch hadd mich dann uffgeklärt: Das wär amerigaanisch unn wird sovill bedeite wie Christmas. Unn dass das uff Deitsch Weihnachde häscht, dass wissd doch langsam jedes Kind. Heilischer Bimbam, hann isch gedenkt, doo iwwernemme die doo driwwe unser Tannebaam unn singe unser Weihnachtslieder unn dooddefier kummt bei uns dann de heilische Claus, wo so herzhaft lacht und am heilische Oowend es X-Kind.

Heute Abend ist die Atzel ab 18 Uhr in einer Lesung im Archivraum der Heimatfreunde in Rohrbach, Bahnhofstraße, zu erleben.