Hann Sie sich aach schunn innerlich, also geischdisch, seelisch unn moralisch doo druff inngestellt, dass mir ab Sunndaach widder e Stunn friejer uffstehn misse. Das dirffd joo besunnerschd de Naachtseile schwer falle. Awwer mei Kolleesche, die Singveschel helfe ihne gääre beim Wachwerre, wann se frieh morjens midd ihrem Begriesungskonzerd losleeje. Unn alles ohne Geema- unn Rundfunkgebiehre. Es sprieße joo aach iwwerall schunn gans gewaldisch die Schneegleggcher unn die Kroküsse in de Vorgäärde. Unn wo mer der Weegetazioon noch e bissje noohelfe muss, doo kummt dann de beriehmde Dengmerder Komposchd als Gaarde-Doping zum Innsadds. Ums mool ganz poedisch, wie das so mei Art iss, aussedrigge: es Friejohr steht schunn ganz nerwees in de Startlecher. Unn weil es Unnernehme Lenz zur Zeit die äänzisch Wachstumsbranche iss, wo uns noch gelieb iss, doo kinnes die Leid ball gar nimmeh erwaarde. Apropos Wachstum: Ich bin graad geschdern amme Haus vorbeikumm, wo drause e simboolischer Klabberstorch midd Fracht gehängd hadd. Na also, es gehd doch! Was jedds aach ausem Boddem eraus spriese duud, wahrscheins weil se die im Winder eifrisch ausgesäät hann, sinn die erschde zaarde Wahlplakaade. Doo kummt joo dies Johr noch einisches uff uns zu. De Bolidiggger im allgemeine schwäddsd joo desweeje aach gääre devunn, dasser gudd uffgestellt wär. Uff de Wahlveraanschdaldunge hänge dann denne ihr Bilder aach. Unn unnerdrunner steht es Originaal. Doo fallt emm e gewissi Diskrepans uff. Späädeschdens im Herbscht soll joo dann vunn de Pardeije die Ernte ingefahr werre. Unn fier denne Fall, dass die nidd so ausgefall iss, wie se sichs vorgestellt hann, gehts dann im Winder ans Inngemachde.