Mundart Midlääd geschenkd, Neid vádiend?
Neid muss man sich verdienen, Mitleid bekommt man geschenkt. Unser Kolumnist ist da ganz anderer Meinung.
Die Daache hann isch‘s mòò widder grääzisch im Radio geheerd: „Neider“ vum Rainhard Fendrich: „Das Mitleid kriagt ma g’schenkt, den Neid man sich verdienen muss.“ Ehrlisch: Isch kann so e Schwachsinn nim’meh heere! Midlääd geschenkd, Neid vádiend – als ironisches Bonmot uffgeschrieb had das vòr 60 Jòhr de Robert (Welches Schweinderl hätten’s denn gern?) Lembke.
Wahnsinnisch originell, wenn‘s mòò widder änner rauswurgsd unn de näägschde Widderkäuer kaud’s weider. Unn erwaad wie de Herr Fendrich forr‘s Abkäse sogaa Respegd, weil „ein andrer nichts getan und zugeschaut hat“. Isch hädd em mehr Hirn unn Herz zugetraud. Wer so uff Schwäschere nòò unne trääd, derf uff mei Respegd vázischde.
Was heischd dann schunn „Vádiene“? E Stimm, wo Leid gefalld? Gudd aussiehn, vun dá Nadur geschenkd odder forr deier Geld vum Chirurg? Stimm vágehd, Scheenhääd noch schneller, Vástand eerschd reschd. Also muss má so dabber wie meeschlisch Geld scheffle. Dann kam’má sisch manscher Luxus-Ramsch leischde. De Herr Fendrich z.B. e neies Audo, „während die ander’n nur auf an Gebrauchten spar’n“. Das halld á hämisch ärmere Leid vòr die Nas, forr Neid se wegge. Awwer wär Aanerkennung nidd scheener wie Neid – unn immerhin meeschlisch?
Neid gebbd’s jòò sogaa schunn gans vorre in dá Bibel bei de Buwe vun Adam unn Eva: De Kain fuchsd‘s, dass em Abel sei Obfer Godd kinnd besser gefalle als seins. Schlaad á ne hald dood – aus Neid. Das soll sisch de Abel vádiend hann? Unn’s angeblisch geschenkde Midlääd? Quadsch! Gäb’s Midlääd wirglisch váschenkd, missd unser Weld annerschd aussiehn, hie unn sunschdwo. Iwwerall! Dass Mensche forr annere Midgefihl hann, das gebbd’s zum Gligg noch; awwer ach ofd genuch? Mensche, wo Midlääd vádiene, krien ofd nur Váachdung unn Drugg dezu. Unn krien se e Fidzelsche Hilf, endstehd grad dòò gelbnasischer, gifdischer Neid. Was is dòò geschenkd unn was vádiend?
Was also anfange mid Leid, denne ihr beschränkdes Menschebild nur Neid odder Midlääd kennd? De Neid kann isch má schengge, was soll isch demid? Awwer so aame Deiwel, wo nur reisch an Geld sinn, schengge isch mei herzlisches Midlääd. Das hann se sisch redlisch vádiend.
