Unser deitschi Sprach iss joo beriehmt unn berüchdischd doodefier, dasse lauder so lange Werder hadd, wo mer mennd, das die gar kää Enn meh finne. Vor allem im Amts- unn Verwaltungs-Schargong sinn die joo schwäär beliebt. Sie kenne sicher all das Beispiel midd dem Donaudampfschifffahrtsgesellschaftskapitän. Weil awwer es Lääwe vill se korz iss fier so lange Werder, desweeje gebbs aach die umgekehrde Tendenz. Fier nämlich die lange sprachliche Bandwirmer widder serechtsestutze, doo hannse sich ebbes ganz geniaales infalle geloss. Unn so sinn dann die ungemein griffische unn manchmool aach putzische Abkerzunge entstann. Doo gebbds die Hipos unn die Hiwis, die Fundis unn Realos, awwer aach so kloore Tüüpe wie die Spontis unn die Knackis. Wo mir Normalos nur schwäär dehinner kumme, was die Ausdrigg all eichendlich bedeite solle.Relativ harmlos iss joo noch so e Begriff wie zum Beispiel de hilfreiche Zivi. Awwer noodemm dasses die Zivildienschdleischdende neierdings nimmeh gebbd, duun se jedds sprachlich e ganz schwääres Geschidds ufffahre. Zum Dank defier, dass sich junge Leid bei dem neije Bundesfreiwilligendienst angaschiere duun, doo nenne se die jedds die Bufdis. So ebbes iss annerseits nadierlich dann e Steilvorlaach fier Mulis (Mundartliterate) unn Dilalis (Dibbelabbesliebhaber) wie mich. Awwer mer muss uffpasse, dass mers nidd iwwertreibt. Sunscht kerzt mer am Enn noch Promenademischunge midd Promis ab unn Stribbeziejer midd Strizis.

In Dengmerd hannse neilich so e Fahrrad fier die Kulduurverwaldung aangeschafft. Unn das duunse ball insetze fier ins Museum se fahre, wo dann e bissje auserhalb leid. Als Museumsfahrdienst. Odder korz: Mufdi.