Zu de beliebdeschde Freizeitbeschäffdischunge geheert joo es Inkaafe. Besunnerschd in der gehobene Form, wo mer dann Shopping nennt. Also sosesaan luschdvolles Inkaafe midd Aanlauf. Weil mer seerschd mool iwwerall nur erumflaniert und begutachde duud, was es so alles gebbd. Unn falls mer dann im leddschde Moment noch die Kurv kried unn merkt, dass mer sich das garnidd leischde kann, doo gilt dann die Parole: Mir gugge nur.Im Vergleich doodezu iss de taachtächlische Inkaaf von de Grundnahrungsmiddel joo ziemlich popelisch. Doodefier kann mer im Noodfall sogar die Mannsleid inspanne. Awwer doo besteht nadierlich die Gefahr, dass die sich in denne ville Gäng glatt verlaafe. Neilich hann ich so änner gesiehn, wo ziemlich uffgereescht vor de Haushaltsreinischer gestann hadd unn ganz gegnäddschd in sei Händi eninngeruf hadd: Glaab mers, das steht doo nidd. Awwer das kummt nadierlich aach doodevunn, dasse die Sache dauernd widder umstelle. De unvergleichliche Loriot hadd in seinem leddschde Interview verzählt, wie er sich bei sorer Geleeschenhääd mool furchtbar blamiert hadd. Er hädd sich lauthals imme Geschäft doodriwwer beschwert, dass in dem Regal, wo immer die Spreegurke gestann hädde, jedds pleddslich die Dameunnerwäsch leije werrd. Allerdings issem dann doch siedendheiß inngefall, dass er schlicht unn äänfach ins falsche Geschäft eninngetabbd iss.

E grooses Lääwensmiddelgeschäft in Dengmerd hadd jedds staddisdisch ebbes Inderessandes rausgefunn: de beliebdeschde Ardiggel bei ihre Kunne iss nidd de Liooner odder es Urpils, das iss e Produggd namens: Ich wääs nidd. Wahrscheins dicht gefolgt an der Worschdthek vunn der bekannde Marke: Vunn dem doo.