Als naaifer unn guudgläubischer Mensch hadd mers joo heidsdaachs schwäär. Midd denne ganze Sireene- unn Schalmeije-Teen, wo mer als Konsument odder als Wähler umworb werd. Unn als mindlischer Bierjer, dem woo sei Meinung angeblich gefrood iss. Doo kanns emm passiere, dass änner middem Mikro vor emm steht unn wisse will, weller Skandaal graad mei effendliches Ärcherniss erreeche duud. Odder es heischt ganz scheinheilisch: Was halle sie als Aussestehender vun Intelligenz? Das Probleem bei all denne Informazioone, wo doo de liewe lange Daach uff uns inprassele, iss joo, dassmer langsam nimmeh wääs, was mer eichendlich noch glaawe soll. Zu dem Thema passt aach die Meldung, dass zur Zeit die Wahrsaacher schwäär Konjunktuur hädde. Unn dass immer meh Falschgeld im Umlaaf wäär. Ich menn, an Faasenacht lass ich mir so e Vorspiechelung vun falsche Tatsache joo noch gefalle: e angebabbder Bart odder e imposandes Tubbee, wo drunner nix iss wie de blanke Kahlschlaach. Manchmool steggt noch nidd mool beesi Absicht dehinner, wammer ebbes in de falsche Hals kried. Es kann aach sinn, dass mer ebbes schlicht unn äänfach falsch verstann hadd. Iwwer das Thema Missverständnisse laafd graad im Zeidungsmuseum in Wadgasse e scheeni Aussstellung. Graad als Kolumnist iss mer joo fier das Fäänomeen besunnerschd dankbar. Unn middlerweile gebbds aach ganze Sammlunge midd Beispiele, wo bei de Leid die Texte vun alde Lieder odder Schlaacher akusdisch ganz falsch aankumme. Mei Lieblingsbeispiel iss das, wo die Fraa beim Wunschkonzert im Rundfunk aanruft unn sich e Titel von Roger Whittaker bestellt: Abschied ist ein schweres Schaf. Das iss doch poetischer wies Original.