Wann sie e greeseri Famillje midd jingere Aangeheerische hann. Doo iss das meischdens zu unn beseddsd. Weil jemand das stunnelang midd Beschlaach beleed. Nää, das Bad, das wo ich menn, das iss es Dengmerder Freibad unn doo kammer seit kurzem widder ganz offiziell ins Wasser hubbse. Allerdings nur wanns scheen Wedder iss. In dem Fall macheses dann widder zu. Weil sich joo Wasser vunn owwe geschäftsschäädischend uff de Badebetrieb auswirke duud. Awwer doodefier kann joo es Schwimmbad nix. Dass mer erfahrt, wanns uff unn wanns zu iss, gebbds jedds e eichenes Kommbjuuder-Programm. Das nennt mer heitsedaachs e App. Also gewissermaase e Bad-App. Awwer das heert sich e bissje aarisch komisch aan. Es koscht iwwrischens trotzdem Intridd, aach wanns Freibad hääscht. Awwer mir derfe joo nidd meggere. Mir sinn joo in Dengmerd noch in der gliggliche Laache, dass mer iwwerhaupt noch e Schwimmbad hann. Odder villmeh sogar zwää, direggd nääwenanner. Ääns fier de Winder unn ääns fier de Summer. In annere Gemeinde doo fallt de Badespass ins Wasser, weil ään Schwimmbad noom annere zumacht, unn zwar definitief .Jedds muss halt nur noch es Wedder mitspiele. Es iss eewe im Summer doch scheener drause an der frisch Luft. Doo kammer dann aach imme Aanfall vunn Heldemut vumm Finfmeederbrett e Kebber mache. Odder äänfach nur sei makelloser Kerper uff der Wies ausbreite, vor sich hin dööse unn sich scheen gleichmääsisch beidseidisch bräune losse. Desweeje kammer denne ganze Wasserradde nur wünsche, dass de Himmel am Wocheenn iwwerm Blau aach werklich scheen blau iss.