Wo mer joo vunn der Sort Veschel so einisches Ehreriehrisches hinner vorgehallener Hand verzählt.

Awwer scheen isses joo worr das Kunschdwerk, wo se doo hingezaubert hadd, das muss mer saan. Obwohl der Vochel aus Edelstahl iss, machder direggd de Inndrugg als werrder glei fortflieje. Desweje hannse ne aach gudd fescht verschraubt. Dasser nidd eventuell naachts heimlich abgebaut werrd unn irjendwo annscherd noch mool ufftaucht, womeeschlich imme ganz fremde Neschd. Doo wääs mer joo in Dengmerd nie.

Die Auswärdische saan joo immer Hassel statt Haasel. Awwer kloorerweis gebbds zum Beispiel im Plattdeitsche e aldes Kinnerlied wo midd der Zeile aanfangt: Kuckuck ob de greene Hassel … Wobei doo awwer de Haselstrauch gemennt iss. Dass die Haaseler denne Uuznoome Kuckuck kried hann, das kammer nur um drei Egge erumm verkliggere. Uff kääne Fall weeje etwaaische Zahlungsriggstänn unn dem daraus resultierende gleichnahmische Uffklääwer.

Das war äänfach so, dass ganz friejer, wo joo sowieso alles ganz annerschd war, es heidische Geißbachtal noch Gauchsbachtal gehiesch hadd. Unn de Gauch, das war eewe de alde Noome fier denne Kuckuck. Wesweeje die Haasler seitdemm denne Noome hann. Mich hadd das Denkmool joo direggd aach lüürisch befliechelt. Unn ich hann noo dem Moddo: Jedds hadd es mich erwischt, ich mache ein Gedicht, e klääner Limerigg iwwer Haasel gemacht: E gestressder Mensch hadd in Haasel, Genuch vunn dem ganze Gefaasel, Sperrt sei Hausdier feschd zu, Endlich hadder sei Ruh, Unn denkt: mei Home iss mei Kaasel.