So e Gerät nennt sich joo aach seltsamerweis Smartphone, was so vill hääsche duud, wie dass es schlauer iss wie mer selwer. Unn Sache kann, wo ich denke, ich stehn im Wald. Wo awwer meischddens sowieso die Verbindung schlecht iss. Unn doo niddsd emm dann aach es scheenschde Händi nix. Friejer hadd mer es Telefon amtlich joo e Fernsprechgerät genennt unn die Nummere misse scheibcheweis wähle. Heid hadd mer e faschd schunn intimes Verhältnis zu seinem Händi unn duud das meh so streichele unn sich an ääs erann taschde. Sie duun sogar behaupte, es gääb so ebbes wie soziale Netze. Weil mer doo midd seine circa 350 Freinde reeschelmääsisch in Verbinnung bleiwe kinnd. Wammer kontakfreidisch iss, iss das joo ebbes scheenes. Unn Gedankeaustausch iwwer de perseenliche Gemietszustand unn die allgemeine Weltlaache aach. Awwer bei dem ganze riwwer unn niwwer Gesimse iss doch vill Geplapper unn Gezwitschere debei. E iwwerdimensionaler digitaler Kaffeeklatsch im Telegrammstil sosesaan.

Unn wammer sich so die Kommentare im Indernedd anguggd, doo iss oft de Mitteilungsdrang umgekehrt proportional zum geischdische Gehalt. Vielleicht sollt mer sich äänfach mool an denne Paragraph im Grundgesetz erinnere, der wo hääscht: Niemand hat die Pflicht, sei Meinung frei zu äußern.