Gudd, er hadd weenischdens noch zwää Feijerdaache. Awwer uff Neideitsch werrd mer saan, der Monaad hadd Probleme midd seinem Immiddsch. Odder kenne Sie vielleicht Lieder, wo de Juni drinn vorkummt.Apropos Lieder: An Pingschde gebbds in Dengmerd aach widder die lange Nacht der Kirchen, midd me hochklassische musikalische Programm bis noo Middernaacht. Normalerweis, wann in unsere Breide naachts gesung werrd, doo iss das joo e Fall fiers Ordnungsamt. Awwer in dem spezielle Fall kammer sicher sinn, wammer uffs reichhaldische Programm guggd, dasses doo niveauvoll, gesiddet unn melodiöös zugeht.Unn am Samschdaach druff gehts gleich in derselb Tonart weider, beim Tag des Liedes in der Innenstadt. Wo iwwer e Dutzend Chöre aus Dengmerd unn Umgebung sich zu rer Art edlem Sängerwettstreit treffe. Am scheenschde unn beliebdeschde iss es Singe nämlich in Gesellschaft. Wesweeje die Chör joo aach oft die Eintracht unn die Harmonie schunn im Vereinsnoome hann. Mer saad joo aach: Mei liewer Herr Gesangverein! Unn de bekannte Volksmund duud desweeje behauppte, dass beese Mensche iwwerhaupt gar kää Lieder kenne. Es gebbd allerdings awwer aach Sidduazioone, wo Tön produziert werre - meischd ziemlich lautstark - wo fier unbeteilischde Ohre nidd unbedingt nur scheen klinge. Awwer das nennt mer dann aach nimmeh Singe.Demnäägschd, bei dem bevorstehende Großereischnis stimmese joo aach widder so Schlachtgesänge aan. Awwer doo machts aach dann nix, wammer de Ton nidd so richdisch treffe duud. Doo gehts nämlich dann um ganz annere Treffer.