Annererseits hädd mer joo jedds widder Zeit unn kinnd noo Luschd unn Laune Freizeitaktiwitääde plane. Am beschde an der frisch Luffd. Apropos Luschd: wie wärs dann heid Oowend middeme Konzerd in der Luschd. Morje unn iwwermorje kammer dann Freilichtkino geniese, äämool in Dengmerd an der Christuskerch unn es annermool in Rohrbach an der Christuskerch. Mer kind awwer aach - noo dem ganze Bohei um die Kicker - mool widder ebbes midd de eichene Fies mache. Zum Beispiel e greeseri Wannerung. Odder wemm das se weitläufisch iss, seminneschdens äämool um de Blogg spaziere. Radfahre iss aach nidd schlecht fier die abgeschlaffde Muschgele. Odder mer geht mool widder ins Freibad schwimme. Die Hauptsach iss, ebbes midd Sauerstoff. Wozu hammir schließlich e Summer!E besonneres Erlebnis fier Jung unn Alt iss joo aach immer e Freiluffd-Uffiehrung in Gräfinthal. Vor allem wanns doo amme laue Summeroowend aach noch so scheen noo frischem Hei duffde duud.Dies Johr spielese doo de Räuber Hotzenplotz. Wo awwer garnidd so jugendgefährdend iss, wie sichs aanheert. Weil der Reiwer e einichermaase harmloser Iwweltäter iss unn de Raub vun der Oma ihrer Kaffeemiehl joo eejer unner Bagatelldeliggde fallt. Auserdem spiele se doo noch e Bearbeidung vumme Shakespeare-Stigg uff Platt. Das Stigg hääscht im Original Ein Sommernachtstraum. Womidd mir dann hinnerum am Enn doch faschd schunn widder beim Thema Fuusball wäre.