Also uff gudd saäälännisch nennt mer so e hoorisches Prunkstigg direggd unnerm Gesichtserker e Schnorres. In denne stirmische Zeide iss joo so e Bart - nääwe der Gladds - ball es leddschde Alläänstellungsmerkmal, wo die arme Männer geejeiwwer vunn de Fraue iwwerhaupt noch uffseweise hann.

Ganz friejer war das joo mool e richdschi Manneszierde unn iss stolz vor sich her getraa worr. Spääder sinn dann effder aach als mool Widdse iwwer Männer midd Bart gemacht worr. Wobei die sich awwer dann so abgeniddsd hann, dass der Spruch uffkumm iss: der doo Witz hadd schunn so e Bart. Unn doo war dann schnell de Bart ab.

Mei Freind Schorsch zum Beispiel, der hadd e ganz alder Kalauer ausgekramt, wie sei Fraa ihne angeflaumt hadd, er sollt endlich das struwwlisch Gemies aus seinem Gesicht entferne. Doo hadder nur gemennt, im Grundgesedds Ardiggel fünf dääd schunn stehn: Eine Rasur findet nicht statt.

Apropos Rasur: Ich hann mich als klääner Bub sellemols immer schunn gefrood, warum eichendlich de Tarzan im Urwald kää Bart gehadd hadd unn wie der doo an sei Rasierabberaad kumm iss.

Wer awwer ganz aktuell es prachdvollschde Exemplar vunn Bart aan sich hadd, das iss de Niggeloos. Wobei mer anhand vunn demm die verschiedene Abschnidde im Lääwe vumme Mann illuschdriere kann. Am Aanfang glaabt mer an de Niggeloos, dann glaabt mer nimmeh an de Niggeloos, aanschliesend spielt mer selwer de Niggeloos unn ganz am Schluss sieht mer aus wie e Niggeloos.