Es geht schlicht unn äänfach doodrumm, dass meechlicherweis die innestädtisch Flaniermeile e Dach iwwerm Kobb krien sollt. Awwer nidd nur die Fußgängerzoon, aach so e dolli Idee will gudd iwwerdacht werre. Also im Sinn vunn noch emool in Ruh se iwwerdenke.

Das ganze Projeggd iss nämlich e tüpischer Fall vunn äänerseits - annererseits. Die Befierworder saan midd Recht, dass die Vorstellung e gewisser Charme hädd: e Hauch vunn Arkadien, e Flair, wie mer aach neijerdings bei uns saad, midde in der Innestadt.

Unn das wär dann fier Dengmerd, so häschts, es beriehmde Alläänstellungsmerkmal. Das iss allerdings e wagglisches Argument. Wann ich nämlich zum Beispiel midd meiner Määnung allään doo stehn, dann wär das joo aach e Alläänstellungsmerkmal. Iwwrischens hammir joo schunn so e Iwwerdachung bei uns, unn zwar uffem Marktplatz. Das nennt mer dann allerdings e Feschdzelt. Awwer ääns muss mer saan, das iss immer voll. Unn das iss wahrscheins aach die Absicht wo doo dehinnersteggt, nämlich dass die Besucher dann masseweis noo Dengmerd streeme werrde. Wammer dieääeid so frood, doo gebbds nadierlich noch e Menge Frage, wo sich de geneischde Innwohner stelle duud: Kummt doo kombledd e Dach driwwer odder nur teilweis? Awwer räänds dann nidd doch eninn? Macht das Krach, wanns druff räänt? Unn wie halt mer so e Dach sauwer? Werrds emm im Summer nidd se heiß doo drunner? Unn unweigerlich taucht dann aach die entscheidende Frage uff: Was soll der ganze Spaß uns koschde?