Was doo so hohe Welle schlaad, dass iss die Meldung, dass die Mehrwertsteijer fier die Saunen bundesweit vunn siwwe uff neinzehn Prozent erheet werre soll. Das verleitet dann zu so Schlaachzeile wie: Finanzminischdeerium nemmt Saunabesucher in de Schwiddskaschde. Wobei noch garnidd richdisch klar iss, wie sich das uff de Endpreis nooher auswirke duud. Weil das midd der Prozentrechnung joo ebbes iss, wo einische entweder in der Schul nidd genau uffgepasst hann odder mangels Iewung im spädere Lääwe es Badehandtuch des Vergessens driwwer gebreitet hann. Die nei Reechelung iss zum Beispiel kää Erheejung um 12 Prozent, wie mer als gelääs hadd. Sondern um 12 Prozent-Punkte, wie mir e Fachmann verkliggerd hadd. Unn doo sinn mir dann aach uff das Thema Mehrwertsteijer im Allgemeine kumm. Das iss nämlich aach fier Leid midd halbweechs intaggdem Verstand e Buch midd siwwe, beziejungsweis neinzehn Siegel. Unn es keimt der Wunsch in emm uff, sie hädde das Gremium, das wo die diesbeziechliche Reechelunge ausgeheggd hadd, vorher unner die kalt Dusch gestellt. Hann Sie zum Beispiel gewisst, dass uff Babynahrung und Medikamente 19 Prozent Mehrwertsteijere erhob werre, uff Katzefudder unn Trüffel awwer nur siwwe Prozent. Das hängt angeblich doodevunn ab, ob ebbes zur Grundversorschung geheert unn zum Verzehr geeichnet iss. Desweeje bezahlt mer dann joo aach uff Goldfisch de heejere Steijersadds unn uff Reitpäärde nur de niedrische. Also wann das nidd zum Wiehere iss!