Desweeje schwäddsd mer joo aach so plasdisch vunn Handel unn Wandel. Das geht sogar soweit, dass mer jedds ball widder e neijes Johr geeje e aldes ausgetauscht hann. Per kronologischem Reseikling: Aus alt mach nei.

Wobei das midd dem alde Johr so e Sach iss. Weils joo schunn ziemlich gebraucht angebodd werrd unn desweeje aach sei Rigggaberecht verfall iss. Fiers Lääwe ganz allgemein unn iwwerhaupt gebbds joo aach jää Umtauschrecht. Doo hädde die zustännische Instanze vill se duun. Mer muss joo schunn froh sinn, wammer geleechendlich saan kann: midd demm doo mecht ich nidd tausche. Awwer de Mensch iss joo aach kää Konsumguud, selbschd wann im Lauf der Zeit de Lagg noh unn noh so langsam abgeht.

De greeschde Umschlachpladds fier gebrauchde Sache unn Sache wo mer selwer nimmeh braucht, das iss joo tradizioonesgemääs de Flohmarkt. Awwer mer kinnd sich nadierlich frooe, wer jedds doo so masseweis Fleeh kaafd. Schließlich werrd uffem Viehmarkt aach Vieh verkaafd. Awwer heidsedaachs iss das alles sowieso vill bequemer unn mer muss sich, wammer alde Sache verklobbe will, noch nidd emool die Fies verfriere. Mer werrd nämlich im Indernedd ganz drohtlos sei Ramsch los.

Unn wammer Gligg hadd finnd mer sogar irjendwo uff der Welt änner, der wo ausgerechend ganz wild uff das gewehnungsbederfdische Erbstigg vumm Tante Luwwies iss. Odder mer find e Abnehmer fier das halwe Duddsend Eierkocher, wo mer selwer sellemols vo da Verwandschafft zur Hochzeit geschenkt kried hadd. Unn so schliest sich dann de Kreis widder.