Friehstigg midd Frischluffd

E guddes Friehstigg als Unnerlaach iss bekanndlich de beschde Start in de Daach. Allerdings kummt de gestressde Zeitgenosse meischdens garnidd doo dezu, weil morjens immer alles hopplahopp gehn muss.

Unn doo reicht im Halbschloof oft die Zeid graad fier e halbtroggenes Breedche unn e Hääbche lauwarmer Kaffee. Iwwrischens fallt mir bei dem Thema immer der alde Kalauer inn, vunn weeje was de Unnerschied wär zwische me Bägger unn me Paschdoor. Ei de Bägger baggds Breedche unn de Paschdor duud breedche.

Die beschde Daache fier mool so richdisch gemiedlich se friehstigge sinn nadierlich die am Wocheenn, wo mer nidd so frieh eraus muss. So midd alle Schikane, midd weich gekochte odder geriehrde Eier fier die ganz Herzhaffde odder midd Hoonisch unn Marmelaad in stigger 150 Variazioone fier die Siesschnisse. Manchmool werrd an so Daache awwer aach es Katerfriehstigg praggdizierd, wos dann nidd vorrangisch uff de Genuss, sondern eejer uff de therapeutische Effeggd aankummt. Awwer weil joo die ganze Stadtfeschde middlerweile abgehakt sinn unn de Whisky-Kurs vunn der Volkshochschul aach schunn e paar Daach vorbei iss, sinn derardische Folcheerscheinunge nimmeh se befürchde. Unn wenn, dann vertreibt de Duft vunn frischem Kaffee den Newwel widder ausem Kobb.

Fier jedds am Sunndaach hadd die Iniziatiefe Mir sinn Dengmerd e klasse Idee gehadd: Mer trefft sich ganz zwanglos in der Fuusgängerzoon zum Friehstigg unn jeder bringt ebbes midd. Die Mooler maches uns joo vor midd ihre Ausstellunge, wo mer aach die Bilder im Freie betrachde kann. Unn weil es Au bekanndlich e Middesser iss, warum soll mer doo nidd mool an der frisch Luft tafele - bildlich geschwäddsd.

Meistgelesen
Neueste Artikel
Zum Thema
Aus dem Ressort