E reiches Schriftstellerlääwe

Wammer in unserer Meedije-Gesellschaft sich e Noome mache will, doo muss mer sich im allgemeine meeschlichst noo vorre, in die erscht Reih drängele. Wo dann es sogenennde Licht der Öffentlichkääd uff emm fallt, vunn demm de Filosof Heidegger gesaad hadd, das es eejer alles verdunkelt

Wammer in unserer Meedije-Gesellschaft sich e Noome mache will, doo muss mer sich im allgemeine meeschlichst noo vorre, in die erscht Reih drängele. Wo dann es sogenennde Licht der Öffentlichkääd uff emm fallt, vunn demm de Filosof Heidegger gesaad hadd, das es eejer alles verdunkelt. Unn dann gebbds doo aach noch die Stille im Land, also die wo nidd glei audomaadisch die Hand heewe, wanns hääscht: Wer will noch midd uffs Bild. Unn das sinn erwiesenermaase nidd die Schlechdeschde. So ääner iss zum Beispiel de Heinrich Kraus, der wo am voorische Samschdaach sei achtzischder Gebordsdaach gefeiert hadd. Aach wanner jedds nimmeh hie wohnt, sondern in Miesau imme ganz verwunschene Heisje, wie sich das fier e Dichder geheert, isser doch seiner Heimatstadt Dengmerd in seinem reichhaldische Werk immer verbunn geblieb. In illusionsloser Anhänglischkääd unn middrer gudd Porzioon Selbschdironie. Unn in all Gaddunge hadder sich getummelt: Er hadd Romane geschrieb, Erzählunge, Gedichte, Kinnerbiecher, Teeaderstigge unn Hörspiele. Unn dasser trotz seiner uneitle Art doch die Anerkennung kried hadd, wo er verdient, dass wär leicht unnertrieb. Mer kannse hie gar nidd all uffzähle, die Preise wo se ihm verlieh hann. Unn er iss in Zisch Sprooche iwwersetzt worr, sogar bis ins Japanische. Wahrscheins, weil er midd seinem Schreiwe ebbes ausgedriggd hadd, was universell iss unn de Nerv vun de Leid iwwerall trefft. Aus der Erfahrung eraus, dass es Lääwe e eewisches Uff unn Ab iss, awwer nur selde e Zuggerschlegge. Unn es Lääwe vumme Autor schunn gar nidd. Odder wie e Kolleesch vunn ihm mool gesaad hadd: Was an der Schriftstellerei so nervt, das iss de Papierkram.

Meistgelesen
Neueste Artikel
Zum Thema
Aus dem Ressort