Bei de Dengmerder Schnäppchedaache. Weil das awwer alles Fachgeschäffde sinn, wo bei der Akzioon middmache, leeje se Wert druff, dass mer trotzdem ebbes Solides kried fier sei Geld. Mer muss heidsedaachs joo als Geschäffdsfraa oder Mann schwäär uffpasse, wie mer sich geejeiwwer seiner Kunnschaffd ausdrigge duud. De Kunne hädd nämlich äänerseits gääre e preiswerdi Ware, awwer annererseits meeschlichst dann doch nix Billisches. Der Ausdrugg hadd jedenfalls nidd die allerheegschde Simpadiewerte. Unn Geiz allään als Inkaafsmotief iss aach nidd jedermanns Sach. De Konsumend iss nämlich e ziemlich scheues Wesen, wo leicht inngeschnappt iss. Ob midd odder ohne Schnäppcher. Desweeje hääscht die Strategie, wo die Kunde aanlogge soll, joo aach Werbung . Wie bei rer Braut. Unn dass aus der Anbahnung e feschdi Bindung werre soll, doodefier gebbds so Akzioone. Besunnerd im Bligg hadd mer doodebei jedds verstärkt die reifere Johrgäng. Was löblich iss unn verninfdisch, weil die hie langsam in der Iwwerzahl sinn.Ich hann iwwrischens bei meine entsprechende Recherche erfahr, wie die praggdische Uffsteller hääsche, wo neierdings vor manche Geschäffde stehn, midd so Werbung druff. Die nenne sich Kunde-Stopper. Also quasi e Stopp-Schild, dass die Passande nidd äänfach so vorbeigehn. Awwer selbschd wann se dann ins Geschäffd eninngehn, iss doodemidd noch nidd gesaad, dass es doo zume Geschäftsabschluss kummt. Weil dann oft de sprichwertliche Satz kummt: Mir gugge bloos.