Benemme iss Gliggsach

Mir lääwe joo in ziemlich freizügische Zeide midd loggere Sidde. Awwer aach Leid, wo sich effendlich die Bux midd der Beiszang zumache, hann schunn mool vumm Herrn vunn Knigge geheert.

Der war sogar sellemools hie in der Geeschend zu Zeide vum Ferscht vunn Nassau-Saarbrigge. Awwer die Zeide sinn längschd vorbei unn unser Gesellschaft iss in puncto Förmlichkääde längschd nimmeh so kniggisch wie de seelische Freiherr. Nidd dass mer uns falsch verstehn: Friejer hannse dass noo der anner Seid iwwertrieb, indemm dass mer nidd bloos innerlich bei jeder Geleeschenhääd had misse strammstehn. Unn die Kinner hann misse es richdische Händche genn. Unn es iss manchmool so fermlich unn zeremoniell zugang, dassmer gemennt hadd, mer wär beim Graf Koks se Besuch.

Awwer heid sieht mer dann die ganze Prolls im Fernsehn, die wo de Anstand midd Leffele gess hann. Awwer middeme ganz lange Stiel, dasse garandierd nidd draan kumme. Vunn Aanstand iss doo nur die Redd, wanns heischt: mir gehn jedds e aanstännisches Bier trinke. Ach iwwrischens, wo mer graad bei dem Thema sinn, hann sie gewissd: Wer gewohnheitsmääsisch in der Nas bohrt, der betreibt Popelismus.

Ganz friejer hadd mer joo es gudde Benemme in der Danzschuul beigebrung kried. Das war aach de richdische Ort doodefier, weil mer sich doo sowieso hadd misse im Takt beweeje unn Riggsicht hadd misse nemme uff annerleids Fies. Unn hadd sich misse weenischdens ansatzweis in Schale werfe, midd Ballklääd unn Annzuuch unn allem Drumm unn Draann. Fascht wie uffem Opernball, wo joo aach die Debütantinne unn Debü-Tante ihr erschde Schridde uffem glitschische Parkett vunn der fein Gesellschaft mache.

Meistgelesen
Neueste Artikel
Zum Thema
Aus dem Ressort