| 20:48 Uhr

Wann werds richdisch Summer?

Aufgepickt. Die Olimpiade iss erumm unn de Auguschd biet aach graad in die Zielgerade inn. Awwer mer muss saan, midd dem was der sich dies Johr geleischded hadd, doo hädder kää Meedallje gewunn. Es kursiert joo iwwer de Auguscht vumm vorische Johr schunn de Kalauer, der wär nur so 08/15 gewään. Die Atzel

Awwer de derzeidische war unner aller Kanoon. Odder wie mir Metereologe so scheen saan: Fier die Johreszeit vill se mies. De April macht normalerweis schunn was er will, so hääschds in rer ald Baurereechel. Awwer jedds hadd de Auguschd uff äämool aach kää Luschd. Obwohl - so wie die Prognose aussiehn, willer uff de leddschde Drigger doch noch e Schibb zuleeje. Als wollder beweise, dassmer sich beim Wedder generell uff nix meh verlosse kann unn uff Iwweraschunge gefasst sinn muss. Awwer ob das noch ebbes bringt iss zweifelhaffd. Außer dass de Kreislauf Burzelbaum schlaad. Wo sich so e beklobbdes Wedder am negatiefschde auswirkt, das iss joo in der Landwertschaft. Der wos diesmool buchstäblich die Ernte verhagelt hadd. Unn im Freibad, doo hadd mer die Besucher meischd kinne midd der Luup suche. Wer sich allerdings bei denne Temberaduure gedenkt hadd, oh wie cool, unn iss trotzdem hin, der hadd an manche Daache es Bad fier sich allään gehadd. Es Dengmerder Bad iss awwer generell schwäär beliebt. Wie mer leicht feschdstelle kann, wammer sich mool die Kennzeiche uffem Parkpladds aanguggd. An äänem Sunndaach zum Beispiel hann ich doo gleichzeidisch Kennzeiche aus Frankreich, aus Österreich, aus der Schweiz unn sogar aus Idalieje gesiehn. Unn aus Minche, Hambursch unn Stuttgart. Wann der Trend aanhalt, dauerts nimmeh lang bis uffem Ortschild steht: Bad Dengmerd!