Wo joo doch nur doodruff enauslaaft, dasses im Summer se heiß iss unn im Winder se kalt. Apropos: In London hann se jedds imme große Kaufhaus schunn mool vorsorglich ihr Weihnachtsmarkt uffgemacht. Weil mer doo bei denne Temberaduure ganz kiehle Gedanke kried. Unn dass die arme Leit nidd unner Zeitdrugg kumme, wannse ihr Geschenke fier Niggelaus kaafe wolle. Woodriwwer in de leddsche Daache in unserm kompaggde Ländche aach schwäär dischbediert worr iss, das iss unser Liooner. Der steht joo bei uns unner Denkmalschudds unn doo verstehn mir aach iwwerhaupt kää Spaß, wann sich doodraan jemand vergreife will. Deshalb hann aach all meeschliche kombeedende Worscht-Beauftraachde zu dem Thema - bildlich gesaad - ihr Senf dezugebb. Unn sogar de Minischder hadd gemennt, er werrd unser Worscht verteidische geeje all, wo der uff die Pell rigge wolle. Unn weil das kulinarische Spitzeproduggd so e rundi Sach iss unn nääwe schmagghaffde Zutaade aach voll Simbooligg steggd, doo iss das sogar beim Patentamt als Marke regischdriert. Unn wies Lääwe eewe so spielt, iss so ebbes nadierlich nidd billisch. Awwer denne Monat laaaft das Patent aus unn fier e Verlängerung iss scheins kää Geld doo. Desweeje kinne Lokalpadrioode jedds im Indernedd e klääner Obulus spende. Allerdings mit dem dezente Hinweis, dass es bei uns nidd die Liooner sondern de Liooner hääscht.