Aufgepickt · Wie heischds in der Werbung : Großes entsteht immer im Kleinen. Das merke die Klääne späädeschdens dann, wanns jedds in die groose Feerie geht. Außerdem kammer an dem Beispiel aach scheen demonschdriere, dass sich Objeggde bei Hidds meh ausdehne. Weil die Summerfeerie vill ausgedehnder sinn als wie die Winderfeerie, wos eejer kalt iss.6 Woche sinn joo e unheimlisch langi Zeit, vor allem am Aanfang. Doo haddmer zischdausend Ideeje, was mer alles doodemidd aafange kinnd. Das iss ähnlich wie middem Urlaub. Der wo awwer aach hinne enaus nidd so lang iss, wie er emm vorre vorkummt. Awwer ich will joo die Feerie nidd gleich widder maadisch mache. E Nääwe-Effeggd, wammer direggd nääwe der Schul wohnt, iss joo, dass mer middachs jedds widder e Parkpladds kried. An manche Egge kinnd mer doo nämlich e Schild hinstelle: Vorsicht Kinder, hier fahren eure Eltern!Die Erfahrunge midd der Schul sinn joo e Thema, wo durch die Bank jeder so sei Aneggdöödcher verzähle kinnd. Weils in dem spannungsgeladene Dreieggs-Verhältnis Schieler - Lehrer - Eltere alsmool hoch hergeht. Unn in e paar Johr sinn das dann alles nur noch wehmiedische Erinnerunge.Fier Kinnder, wo in der Zeit dehemm bleiwe, gebbds in unserer Reeschioon e ganzi Ladd vunn Feerie-Programme. Unn die annere, wo verreise, denne werrds bestimmt aach nidd langweilisch. Wie saad mer so scheen: Wenn einer eine Reise tut, dann kann er was erzählen. Unn hinnerher e Aufsadds schreiwe midd dem Thema: Mei scheenschdes Feerie-Erlebnis. Es gebbd awwer ganz schlaue, wo unnedrunner schreiwe: Weil an dem Erlebnis mehrere Persone beteilischd ware, die nidd genannt werre wolle, fallt der Bericht leider unner de Dateschudds.