Unn aach wann dann die Plaggerei middem Schneeschibbe wegfalle werrd, wär das aus äästeedische Gründe irjendwie doch schaad. Es Au feijert joo aach midd. Unn weeje der Entwigglung steht joo aach de Klima-Schutz awweile ganz owwe uff der Tagesordnung. Doodebei iss der Ausdrugg e bissje irreführend. Es Klima bräuchde mir eichendlich garnidd se schiddse. Klima iss joo generell immer, sogar bei 45 Grad im Schadde. Es frood sich eewe nur, obs dann fier uns noch gesund iss. Manche Leid menne allerdings, das werrd sie weenisch jugge, weil se in ihrem Prachtstigg e Klima-Anlaach hann.Wos nadierlich ganz besunnerschd wichdisch iss, wies widderungsmääsisch aussieht, das iss uffem Weihnachtsmarkt. Am Woche-Enn macht die Innestadt de Abschluss vunn rer ganz Handvoll hie bei uns. Doo geht de bange Bligg noo owwe: bleibst drogge, kummt ebbes runner. Unn wann joo, in wellem Aggregatzustand. Mer hädd joo nidd gääre so e tristes Suddelwedder wie die ganz Zeit. Liewer e zinfdischi Vorweihnachts-Stimmung midd Licht, Duft unn Wonne. Unn falls mer noch nidd alle Geschenke beisamme hadd, gebbds am Samschdaach noch e Spät-Shopping. Das iss nidd es Geejestigg zum Frieh-Schobbe. Nää, doo kammer sich bis spät oowends um zehn Uhr noch die Kauflaune aanreeche lasse. Advent reimt sich nämlich aach uff Konsument. Awwer vor Weihnachde iss das joo vellisch in Ordnung. Weil mer sei Inkaaf joo aus em edelschde aller Motiefe täädische duud: fier alles se verschenke.