Weil se doo weeje dem Stadtlauf e paar Stroose ganz gesperrt hann. Wo sunschd die Dengmerder durch die Fußgängerzoon flaniere, doo fliddse se jedds im Pulk. Mer kinnd faschd saan, in Dengmerd iss immer ebbes am Laafe.Allerdings kammer nidd nur im Sport sei Bään beweeje. Mer saad joo aach als im Spass: Es gebbd Sache wo krawwele. Es gebbd awwer aach vill Sache wo laafe: Im Kino und im Fernsehn laafe die Filme, die Nas laaft aach als unn nidd nur im Winder. Unn wammer beim Tante Lissbedd ingeladd iss, doo hääschds: Ich loss als schunn mool de Kaffee durchlaafe. Es gebbd aach die Laaferei uff die Behörde unn uffs Amtsgericht. Das nennt mer dann e laufendes Verfahre. Aach wanns nur ganz langsam vorangeht. Unn wann emm dann ääner frood: Unn, wie laafts, doo seufzt mer: Schleppend!Awwer es Geejedääl iss aach nidd graad se empfehle: Wammer im Alldaach unn im Berufslääwe wie gedobbd durch die Geeschend laafd unn im Schweinsgalobb Heggdigg verbreide duud. Dass die genervde Kolleesche de Kobb schiddele: Ich glaab, der hadd ääner renne.Komischerweis soll fußläufischi Beweeschung awwer schwäär gesund sinn, wammers sportlich unn midd Begeischderung betreiwe duud. Also weenischer heggdisch unn meh leichtfiessisch - wie bei dem Stadtlauf. Weil mir das als uraldes Erbe eichendlich schunn in de Gene hann, dassmer unser Bään nidd verkimmere losse. Odder wie de legendäre Langstregge-Läufer Zatopek gesaad hadd: Vogel fliegt, Fisch schwimmt, Mensch läuft.