Es Wedder iss nämlich leider nidd immer so, wie mir menne dasses sinn sollt. Unn doo helfts aach niggs wammer em Frosch uff der Lääder Feijer unnerm Hinnere macht. Es macht halt äänfach wasses will. Es äänzisch definitiefe was mer saan kann iss, dasses laufend wechselt. Sie kenne joo die ald Bauerereeschel: Wenn der Hahn kräht auf dem Mist, ändert sichs Wetter oder es bleibt wies ist. Jedds misst mer nur noch spitzkrien wie die Bauere das gereeschelt krien. Die Leit wolle nämlich meeschlichst genau wisse, wies Wedder demnäägschd so werrd. Unn doodefier gebbds die Weddervorhersage. Die wo dann meteorologischi Lüürigg von sich gebbd: stark dunstig bis neblig trübe. Unn doo erfahrt mer dann, ob es Gaardefeschd an Pingschde aach werklich im Freije iwwer die Biehn gehn kann. Odder obs em geht wie meinem Freind Schorsch, der wo wiedisch beim Wedderdienscht angeruf hadd. Er werrd graad es angekindischde anhaltende Hoch aus seim Keller bumpe. Awwer eichendlich, so saan se an der Nordsee, gebbds gar kää schlechdes Wedder, nur die falsche Klääder. Dasses middem Wedder ruff unn runnner geht, dass leid doodraan, dass sich de Hochdrugg unn de Tiefdrugg nidd äänisch sinn. In Dengmerd gebbds noch denne Sonderfall, dasse hie midd Hochdrugg im Tiefbau zu gange sinn. Awwer das iss widder e ganz anneres beliebtes Thema.