Allerdings bringes die Dengmerder Volksverdrehder sogar in dem Fall manchmol ferdisch, fier sich doodriwwer in die Hoor se grien. Awwer ich wollt joo iwwer ebbes erfreiliches schwäddse: iwwer e Feijer bei der Wehr. Wobei sich bei der Feijerwehr allerdings imiddschmääsisch das Problem ergebbd, dasse de Leid am simpaadischsde iss, wannse garnidd erscht gebraucht werrd. Awwer fier de Fall der Fälle, so saad mer sich, isses dann doch gudd, dassmer se hann. Unn wanns eventuell nur iss, fier die Katz vum Baam se holle. Weil mer doodefier e ganz groosi Lääder braucht.

Uff jeede Fall iss die Feijerwehr e vielseidischi Insaddstrubbe. Wo die Naduur-Elemente generell im Griff hann muss unn nidd nur es Feijer. Unn das ganze aach noch freiwillisch. Unn fix misse se sinn. Deshalb saad mer joo aach, wann jemands ganz eilisch hadd: Der doo iss aweile awwer ab wie die Feijerwehr. Unn vorher hadd mer ne noch korz gefrood: Ei saamool, wo brennts dann? Iwwrischens gebbds iwwer die Feijerwehr sogar e beriehmdi klassischi Musigg vumme gewisse Georg Friedrich Händel .