Eisheilische unn Schafskälde
Aufgepickt · Jedds iss de Mai als widder vorbei. Awwer er hadd diesmool seinem Noome kää Ehre gemacht. Das war doch eejer e Wanne-Monaad wie e Wonne-Monaad, so hadds die leddschde Daache geplääsderd. Ich kann mich noch gudd draan erinnere wie mool am erschde Mai es Freibad uffgemacht hadd.Awwer ich will nidd widder es Hohelied vunn sellemols singe.
In der Beziejung isses joo komisch: Mer derf heid nimmand meh als alt verschille. Nur ausgerechend die alde Zeide solle e besonnerschd gudder Johrgang gewähn sinn. Awwer egal: was eewisch jung bleibt iss es Meggere iwwers Wedder. Vor allem wanns noch nidd so iss, wies sinn soll unn fier die Johreszeit zu kiehl.Unn wammer so Schlachzeile wie "Schneeschogg im Mai" gelääs hadd, doo hadd mer dies Johr garnidd gewisst, ob mer sich schunn die Winder-Rääfe abmache losst. Odder ob mer besser waard bis die Eisheilische erumm sinn. Mei Freind Schorsch wollt joo partout behaupte, bei seine Rääfe hädde se de Gen-Teschd gemacht. Joo, hadder gesaad, die hann geguggd ob se noch gehn. Awwer wann die Summer-Rääfe druff sinn, doo gehts joo dann widder unn zwar uffwärts. Sogar middem Wedder. Ringserumm spriest alles in üppischem Grien, die Blume duun midd ihre Leuchtfarwe strunze, die Lämmcher hobbse iwwer die Wies. Unn es fluuchfäähische Feddervieh liefert sich vunn morjens frieh bis spät Oowends e Sängerwettstreit.
