Was in dem Punkt heit nimmeh so häufisch genomm werrd, das iss joo es Lamedda. Das iss beim Loriot schunn em Opa Hoppenstadt uffgefall, dasses friejer vill meh doodevunn gebb hadd. Unn desweeje hadd jedds aach die leddschd Fabrigg in Bayern, wo das hergestellt hadd, zugemacht. Notfalls muss mer dann an die kahle Stelle ebbes anneres draanhänge. Vielleicht sogar ebbes, wo die Kinner gebastelt hann. Selbschdgemachdes iss joo an de Weihnachde immer noch es scheenschde, aach wanns nidd ganz hunnerdprozendisch iss. Ob das jedds Pläddsjer sinn odder Baumbehang. Manchmool iss joo sogar sogar de Stress an de Feijerdaache selbschdgemacht. Was mer an Weihnachde joo iwwerall sieht, das sinn Sterne. Entwedder aus Glanzbabier odder midd Zimt unn Zuggerguss. So e Stern hadd joo aach so ebbes Magisches unn Simboolträchdisches. Das steht schunn in der Weihnachtsgeschicht. Sogar wann jemand middem Kobb irjendwo degeejeknallt, doo saad mer dasser Sterncher sieht. Dann duuds glei nimmeh ganz so weh. Unn wammer ääs besunnerschd gääre leide kann, doo seufzt mer: mei Augenstern! Unn als Zugabe duud mer feierlich verspreche, dassmerm die Sterne vum Himmel hollt. Mer kann sich allerdings denne Uffwand aach spare unn stimmt das scheene Weihnachtslied an: Komm setzt dich ans Fenster, du lieblicher Stern!