Das geht joo wie genuudelt
Aufgepickt · Anscheinend fallt joo leider in dem Johr de goldische Oggdoower wedderbedingt aus. Bleibt nur se hoffe, dass das kää schlechdes Oomen iss fier de kommende Winder. Mer sieht nämlich als schunn die flinke Eichherncher iwwer die Stroos fliddse wo jedds e sadder Vorrad fier die kalt Johreszeid bunkere.Unn aach de Mensch braucht um die Johreszeid ebbes Deffdisches als gehaltvolli Unnerlaach, selbschd wanner kää Winderschloff halle duud.
Am beschde eichne sich doodevor die bekannde Kohlehüüdrande. Was sich awwer nidd besonnerschd abbediddlich aanheere duud. Desweeje muss mer die aach ernährungstechnisch entsprechend legger verpagge, zum Beispiel in Form vunn Teichware. Wanns drause anfangt se friere, geht nämlich nix iwwer Nuudele odder wie mir abgebriehde Gourmees aach saan iwwer Pasta. Also die Pasta fier zwische unn nidd fier uff die Zähn.Unn irjendwelle Schlaumeijer hann aach aus dem Grund de indernazionaale Weltnudeldaach feschdgeleed. Unn der iss juschdamend am näägschde Sonndaach, am 25. Oggdoower. An Nudele gebbds joo sovill Sorde midd klangvolle Noome, dasses fier e halwes Dutzend Quiz-Sendunge lange werrd. Mer muss nur uffpasse, dass mer sich vorm Verzehr doodebei nidd schunn die Zung verknoddelt. Am beschde schmagge nadierlich die Selbschdgemachde, wammer de richdische Dreh raushadd. Dann gehts wie genudelt. Ganz friejer seit de fuffzischer Johre hadds in Rohrbach joo sogar noch e richdische Fabrigg gebbd, wo Paul's Eiernuudele hergestellt worr sinn. Unn zwar aus frische Eier.Unn e spezielles Werkzeich fier die Nudel-Herstellung, was bei uns Welljerholz hääscht, werrd manchmool noch in uralde Witze als Kommunikations-Prothese missbraucht.
