Am scheenschde iss doch dehemm

Aufgepickt · Es Fernsehn hadd graad e ganzi Woch lang es Thema Heimat behannelt. Sosesaan als Unnermalung unn Kontrast zu de derzeidische Schlaachzeile. Unn doo hann se aach e preisgekreender Kino-Film gezeid, wo de Titel "Heimat" gehadd hadd.

Der wo nidd weit vunn uns hie spielt unn wo sogar e paar Mime aus Dengmerd als Komparse middgespielt hann. Wie der Film sellemools 1984 gedreht worr iss, doo war der Begriff awwer kulduurpoliddisch noch e bissje verpönt. Interessanderweis hannelt de leddschde Dääl vunn dem Meischderwerk doodevunn, wie Leid vunn hie aus in die Fremde auswannnere, weilse dehemm kää Perschbeggtiefe meh fier sich gesiehn hann. De klääne Bruder vum Heimatgefiehl iss de Lokalpatriotismus, wo am scheenschde uffem Fuusballpladds Blüüde treibt. Odder e bissje kuldiwierder imme Heimatmuseum, wo mer sich uff sei Worzele besinnt unn ganz konkreed sieht, wo mer eichendlich herkummt.Vorm Hinnergrund vunn de sogenennde Globanalisierung - wo mer im Extremfall iwwerall unn nirjends dehemm iss - sehnt sich de Mensch noo so rer Art regionaler Kuschel-Egg. Unn find die Neschtwärme notfalls am vill geschmähte Stammdisch. Wo trotzisch de Spruch steht: Hie hugge die, die wo immer hie hugge. Unn fachsimpele unner annerem iwwer de Sesammehang vunn Dorscht unn Hemmweh. Apropos - es Hemmweh iss joo es schmerzliche Geejestigg zum Heimatgefiehl. Fier all die wos in die Fremde verschlaa hadd, unn wanns aach nur zeitweis im Urlaub uff de Azore iss.Wie zum Beispiel de Trubadix, e entfernder Bekannder vumm Asterix . Denne hann se noo Rom verschlebbt. Unn in de Bulles inngesperrt. Unn doo singder dann ganz sehnsuchtsvoll: Ich hugge hie unn hann die Flemm - unn ich will hemm!

Meistgelesen
Neueste Artikel
Zum Thema
Aus dem Ressort