Wobei ich glaab, dassmer sich, wammer midd funkelnaachelneije Scheine bezahlt, evenduell erscht recht verdächdisch macht. Unn wammer nur Minz hinleed, doo werrd mer unweigerlich gefrood, ob mer im Hinnerhof singe war. Obwohl joo die Finanzverwaldung e verständlichi Blüten-Allergie hadd, hannse uff de Scheine neijerdings de Hinweis weggeloss, noo wellem Paragraph es Fälsche verbodd iss. Es hadd nämlich weenisch gebrung, weilse denne Hinweis gleich midd gefälscht hann. Awwer um das se verhinnere, werre die Scheine immer raffinierder uffgemoddsd, dassmer se nimmeh noomache kinnd. Midd Wasserzeiche, Hologramme unn me inngebaute Finschder, wo mer durchgugge kann, wammers geejes Licht halt. Das erinnert mich sn denne Spruch, wo de Schorsch sellemools zu seinem Intimfeind gesaad hadd: Sei Absichde wäre wie Finschderscheiwe: schmuddsisch awwer durchsichdisch.Es werrd joo heid iwwerall getriggsd unn geflunkert, dasses nimmeh scheen iss. Uff de Verpagggunge iss innewensisch nur in seldene Fäll das drinn, wo drausse druffsteht. Mer wääs joo ball nimmeh, was mer iwwerhaupt noch esse soll. Wammer erfahrt, dass die scheene Erdbeere midd ihrem Aroma aus Sääjespään sesammegefriemelt worr sinn. Desweeje sieht mer aach manche Kunne durch die Regale laafe wie Falschgeld. Awwer wannse erscht mool es Bargeld ganz abgeschafft hann, doo kann das midd denne naddur-identische Geldscheine sowieso nimmeh vorkumme.