Heringe uff Rezebbd

Heringe uff Rezebbd

Jedds isse also als mool widder erumm, die närrisch Zeid. Die Faasenachtsflichter truudele allmählichlich aus alle Himmelsrichdunge widder inn. Unn so langsam verfallt mer widder in de normale Trodd. Obwohl - was iss heid schunn normaal? Die iwwer die Daache zugeloffene Kaader sinn middlerweil fachmännisch beziehungsweis weiblisch midd ingeleede Hausmiddelcher kuriert worr

Jedds isse also als mool widder erumm, die närrisch Zeid. Die Faasenachtsflichter truudele allmählichlich aus alle Himmelsrichdunge widder inn. Unn so langsam verfallt mer widder in de normale Trodd. Obwohl - was iss heid schunn normaal? Die iwwer die Daache zugeloffene Kaader sinn middlerweil fachmännisch beziehungsweis weiblisch midd ingeleede Hausmiddelcher kuriert worr. Das hadd nämlich sellemools schunn die Oma gewissd: Gib ihm Saures, das helffd emm Babbe widder uffs Fahrrad. Unn prompt iss de Kobb, in dem woo am Aschermiddwoch noch e middleri Kabell de Zabbestreich gespielt hadd, aach langsam widder uff Normalmaas geschrummbelt. Per Aspirin ad astra, wie mir Laddeiner saan. Ganz besunnerschd gudd schlaad die Kuur awwer aan, wammerse zusäddslich midd Beweechung an der frisch Luffd verbinne duud. Unn wammer dann so durch de Dengmerder Wald marschiert, doo kammer sich an dem e Beispiel nemme. Der hadd sich nämlich, laut Waldschadensbericht, aach widder ganz gudd erholt. Na also, denkt mer doo erleichderd, es geht doch! Ganz friejer hadd mer sich allerdings zum Ausklang vunn der Faasenaacht e Aschekreiz geholl unn iss fier e paar Woche faschdenderweis in sich gang. Awwer unser heidischi Gesellschaffd kann die nidderschmeddernde Tatsach, dass alles mool e Enn hadd, seelisch unn moralisch nidd so gudd verkraffde. Unn warum soll er in sich gehn, so saad sich de bedribbsde Zeitgenosse. Wie er aus Erfahrung wääß, isses doo drin aach nidd vill scheener. Desweeje geeder an Aschermiddwoch liewer widder aus sich eraus. Unn huggd widder in der Wertschaffd, wo er sich in frehlicher Runde midd de annere Kameraade puddsmunder als Heringsbändischer beweihräuchere duud.

Mehr von Saarbrücker Zeitung