Huddel met Knoddelbeidele
Will ma ebbes esse, muss ma inkaafe - unn gischter hann ich metgehn misse. 'S Audo war in de Werkstatt unn mei Fraa wollt net alles vum Subbermarkt alleen heemschleppe. Noo'rer Stunn im Lade war unser Inkaafsweensche voll gelad, unn ich war aa gelad. Wie ma endlich dorch die Kass ware, hammer die ganz Fressaasch in zwää große Tuude omgepackt. Meer hann awwer die Äbbel vegess gehat unn ich hann selle noch sechs kaafe gehn. Also bin ich, metteme Gesicht wie drei Daa Reenwetter, ans Obstregal. Ich hann die owwere zwää Kischte Äbbel angehob, well meischtens joo unne frischerie War leit. Ich hann noo links unn rechts geschielt, ob grad jemand guckt, wollt dann dabber unne e Abbel erausziehe, hann ma awwer doodebei die links Hand ingequetscht. Die owwere zwää Kischte wäre fascht omgekipppt - jetzt hann die Leit noo meer geschielt.
Die Plastiktiedscher, wo 's Obst eninkommt, hääße "Knotenbeutel", well se owwe zugeknibbelt werre. Besser däät der Schammass "Knoddelbeidele" hääße, well ma stunnelang eromknoddele muss, bis ma eener enzischer Beidel vun de Roll abkriet und dann owwe uffkriet. Normal verreiß ich drei bis vier, dissmoo wares eher zeh. Egal, was ich vesucht hann, die Dinger ware zugebabbt wie met Sekunneklääwer. Ich hann met Daume unn Zeischefinger geriwwelt, hann noch Spauz an die Fingere gemacht, hann geschittelt - nix. Die Leit hann schroh geguckt, vor allem, wie ich die vekrumbelte Beidele uffs Obst geleet hann. Eerscht wie ich met de Zehn de Rand e bissje ingeriss hann, hat's geklappt.
Wie die Äbbel endlich drin ware, iss de Beidel unne uffgeriss, bestimmt zum Ausgleich, dasser owwe net uffgang war. Alles iss uff de Boddem gekullert, unner Regale, zwische Räder vun Weenscher unn Been vun Kunne. Ich bin eromgekrawwelt, hann Gott sei Dank immer noo unne gucke misse, awwer net nur wääm Bicke e knallroter Kopp gehat. Fünf vun sechs Äbbel hann ich gefunn unn uffgelääst, die drei met Blotzplacke hann ich serick in die Kischt geleet. E halb Stunn später ware imme annnere "Knotenbeutel" nur einwandfreie Äbbel drin. Vor'm Geschäft hann ich vun Meinem aa noch gescholl kriet, ich hätt e Ewigkäät gebraucht. Dann hann ich alles heemschleppe däärfe. Zwää schwere Tuude hann ich in de Hänn unn später Bloose an de Hänn gehat - und viel Leit behaupte trotzdem, ich hätt vun Tuude unn Bloose kenn Ahnung.
"Plattmacher" Günther Hussong, Vertreter der rheinfränkischen Mundart, wohnt in Kirkel-Neuhäusel. Informationen unter www.mundart-saar.de
